Ut ontjstaon van de vastelaovesvereniging de Donderból.
Op vastelaoveszondig in 1975 in de aaj donderie wo noe de kienjerboerderie sjteit ‘
waas Frans Meisters oetgeroope as Frans I van de put Don ’67 mit de sjpreuk:
“Mit de put neet veur sjut”.
Der waas noch gein foto van Frans en Karel Linnartz maakde van Frans ein foto en ging die
direk in zien duuster kamer afdrökke en kwaam nao ein oer truuk mit de grote foto van Frans,
die noe nog stjeeds in de Donderie bie de aadprinsegallerie hingk.
Zien adjudantes waare de dames Nel Munnix en Tiny Deckers.
Op ein gegaeve moment zagte veer: kinne veer neet ein vastelaovesvereniging op de Donderberg oprichte. Aafgesjpraoke waerde det veer de volgende waek bie Huub Vorage (+)
dae toen oppe Bachstraot woonde biejein zolle komme om te probere zoget van de grondj
te kriege.
Nao ein paar waeke hadde veer ein man of 6 biejein, maar det moste der minimaal 12 zeen,
nl. 11 man raod van ellef en eine vorst.
Langzamerhandj lökde os det om der get miense bie te kriege en waar de club kompleet.
Echter nog gein pekskes en auch geine sjteek.
Veer hadde nog geine naam en ut idee waerde gebaore om mit ein enveloppe-actie op de Donderberg veur sponsering en in de enveloppe kos men eine naam in doon veur os vereniging.
Als dan van alle name der twee euver bleve waas det “donderböl en donderbök.” Mit vaol
stjumme kwaam oet de bus de “Donderböl”.
Veer haolde genog op om bie Mackintoch in Stein 12 zwarte päkskes mit korting te kriege en
de mötse waerde gekoch bie Biebi Bierbaum (+) dae toen eine winkel runde mit ongerangere auch vastelaovesgerei.
De witte hemde en rooj strikskes waerde door os zellef gekoch.
En op de 11 van 11 in 1975 kwame veer in ein euvervolle nuuj donderie binne mit eine raod van Ellef en eine Vors: genaamp: Vors Karel !
Nao Frans I van de put wolle veer eine eige prins oetroope en det waerde Huub I (Huub Vorage) dae ouch ein van de oprichters waas.
Veer ginge ouch op vastelaoveszaoterdig nao de sjeuteleuverdrach op ’t sjtadhoes, maar prins
Huub I kreeg geine sjeutel omdet veer nog neet opgenome ware in ’t SRV (samewirkinde Remunjse Vastelaovesvereniginge).
De Donderböl trokke auch mit häöre Prins in de kienjeroptoch op de Donderberg, dae altied plaats vonj op vastelaoveszunjig, en veer ginge auch de eerste keer mit in de optoch in de Stad op vastelaovesmaondig.
De waage waas geboewd biej ut fruithuis van Sef Geraeds wo noe de Sjterreberg lig, (veurheen “planete-buurt”) Ut waas sjoon om mit zovaol miense same dae wage te make, veer hadde vaol plezeer doaan. En waerde mit soep e.d. verzorg door Tonnie Noel, die dao toen vlakbie woonde.
De vastelaovesvereniging waas gebaore en der kwaame nog wages in de volgende jaore nao,
die alle dao geboewd waerde . Later waerde de wages veur de prinse gehuurd, om det ter op dees locatie gein plaats meer om te boewe waas. De letste wage dae geboewd waerde bie ut fruithoes waas dae van prins Theo I (Theo Smeets).
Veer höbbe dae tied heel vaol gooi prinse gehad en neet te vergaete ein vol Donderie
mit döks 1200 miense ‘s aoves zodet de pliese kwame det as ter 3 droet ginge, veer der weer 3
binne mochte laote , zo drök waas ut.
Auch waas der eine sjlager van Joke Linnartz van “Oos Donderie, die gekke priej, die sjteit dao midde op det plein.” Elk jaor daonao kwame der Prinse-sjlagers , zowaal van Joke, als van Dré Fonteijn, wo de miense vaol plezeer aan belaefde!
Ouch de eerste Bontje Aovende kwame door häör toet sjtandj en waerde echte “knallers” veur de Donderböl , wo eederein mit vaol plezeer aan mitwirkde!!
Ut is good te weete det de V.V. de Donderböl al meer dan 33 jaor besteit en neet meer weg
te dinke is op de Donderberg!
Ouch krege veer ein dansgarde , die onsjtaon is oet ’t toenmalig jeughoes de “Bliksem” wo noe
ut moodercentrum “Maxi-Mina”zit.
De “Bliksem” had eine jeugprins eeder jaor en ein jeuggarde. Dae prins waerde vanaaf 1976
door de Donderböl geïnstalleerd. Door de samewirking mit de leidsters van de “Bliksem”waas
ut meugelik , det dae jeugprins en zien garde biej os op de prinsewage stong.
Ouch höbbe veer enkele jaore mit getrokke in de optoch van den “Daol”in Herkebosch, omdet
veer eine vrachwage hadde van de firma Middelkoop, die waal wolle höbbe det veer dan ouch
in Herkebosch mit trokke op vastelaovesdinsdig, veur de “reklaam”.
Noe höbbe de Donderböl allang eine eige jeugprins ,jeugraod en jeuggarde en ein grote garde ,
die sjteeds veurtreffelik geleid waere door versjillende eige krachte (dames) vanoet de Donderböl , en die ouch nog sjteeds ein visite-kaertje veur dees vereniging aafgaeve!!
In de begin jaore (in de aaj Donderie), krege de Donderböl ouch ein eige mascotte te weite “Donderpeerke” dae volges traditie nog altied in de Donderie waert gehange biej ut aad prinse bal
en op vastelaovesdinsdaag weer in zien kies verdwient veur ein gans jaor !!
Nog sjteeds waert biej die ceremonie menig treunke gelaote es ut leedje “os Donderpeerke” (door Joke gesjreve), waerd gezonge, wobiej de prachtige ongerlinge bandj dae ontsjteit tiedens dees vastelaovesdaag pas echt toet oetdrökking kömp!
De pop Donderpeerke waerde gemaak door Chris Bosma(†)
Ouch moge veer neet vergaete det de Dondereböl ein “DIT- team” kreëg, det zorgde det veer op
recepties biej angere vastelaovesvereniginge, neet allein de jaormedalie gove, maar ouch get
leuks brachte, det sjloog op ’t werk, op de sport of hobbies van eine prins.
Veer haope det , als De donderböl 44 jaor besjteit , dit nog ein vereniging is om mit plezeer op truuk te kome!
Väöl mood en krach zal dao veur neudig zeen, zeker in deze tied!
Maar mit ein good bestuur , eine gooie raod en Vors, fijne damesgardes, gooie jeugraod
en ein good T.W.C. (technische werk commisisie) en dergelijke mot det zeker kinne!
Gesrjeeve door miense van ’t eerste oer:
Nico Bleijswijk (Ere Raodslid) en Karel Linnartz (Ere Vors).
